Saturday 17 November 2012

ಕಡಲೆ ಹಿಟ್ಟಿನ ರಾಜಕುಮಾರಿ

2
ರಾಜಕುಮಾರಿ 

ಊರೆಲ್ಲಾ ತಿರುಗಿ ಕುಣಿದು ಬಂದವಳಿಗೆ ಅಜ್ಜಿಯ ಮಡಿಲಲ್ಲಿ ತಲೆ ಇಟ್ಟು ಕಣ್ಣು ಆಡಿಸುತ್ತಾ, ತಾರೆಗಳನ್ನು ಕೂಡಿಸುತ್ತಾ ಕತೆ ಕೇಳುವುದು ಅಂದರೆ ಮುದ್ದಾದ ಮೋಜು. ಕಡಲೆ ಹಿಟ್ಟಿನ ರಾಜಕುಮಾರಿಯ ಕತೆ ಹೇಳು ಅಜ್ಜಿ ಅಂತ ಒಂದೇ ರಾಗ, ಹೋದವಾರ ಇನ್ನೂ ಅದೇ ಕತೆ ಹೇಳಿದ್ನಲ್ಲ ಬಂಗಾರಿ ಅನ್ನೋದು ಅಜ್ಜಿಯ ಹಿತವಚನ ಆದರೂ ನನಗಂತೂ ನಿರಾಶೆ ಆಗುತ್ತಿರಲಿಲ್ಲ. ಪ್ರತಿಬಾರಿ ಕತೆ ಆಲಿಸುವಾಗಲು ಮರುಕಳಿಸುತ್ತಿದ್ದ ಹೊಸ ಹಳೆಯ ಪ್ರಶ್ನೆಗಳು. ಅಜ್ಜಿ ರಾಕ್ಷಸಂಗೆ ರಾಕ್ಷಸಿ ಇಲ್ವಾ ? ರಾಕ್ಷಸ  ರಾಜಕುಮಾರಿಯನ್ನು ಮದುವೆ ಆಗ್ಬೋದ ? ಅಜ್ಜಿ ರಾಜಕುಮಾರ ಎಲ್ಲಿರ್ತಾನೆ ? ರಾಜಕುಮಾರನಿಗೆ ರಾಜಕುಮಾರಿಯ ಗುರುತು ಹೇಗೆ ಸಿಗತ್ತೆ ? ಅಜ್ಜಿಗೆ ನನ್ನ ಪ್ರಶ್ನೆಗಳ ಉತ್ತರ ನೀರು ಕುಡಿದಷ್ಟು ಸುಲಭ, ನನಗೆ ಆ ಉತ್ತರಗಳಿಂದಲೇ ನೆಮ್ಮದಿ ಹಾಗೂ ಅವುಗಳೇ ಸತ್ಯ. 

ರಾಜಕುಮಾರನ ರೂಪ ಧರಿಸಿ ಬಂದಿದ್ದ ರಾಕ್ಷಸನಿಂದ ಪಾರಾಗಲು ಅವಳು ತನ್ನದೇ ರೂಪದ ಕಡಲೆ ಹಿಟ್ಟಿನ ಬೊಂಬೆಯನ್ನು ಮಾಡಿಟ್ಟಿದ್ದು, ಬೊಂಬೆಯೇ ರಾಜಕುಮಾರಿ ಎಂದು ನಂಬಿದ ರಾಕ್ಷಸ ಕಡಲೆ ಹಿಟ್ಟಿನ ರಾಜಕುಮಾರಿಯನ್ನು ಹೊತ್ತು ಒಯಿದದ್ದು. ಹದಿನೆಂಟು ವರುಷಗಳ ಹಿಂದಿನ ಛಾಯೆಗಳೀಗ ನೆನಪಿನ ಅಂಗಳದಲ್ಲಿ ಮೂಡೋ ಬೆಳದಿಂಗಳ ನಕ್ಷತ್ರಗಳು. 
ಆ ಕತೆಯಲ್ಲಿ ಬರುತಿದ್ದ ರಾಜಕುಮಾರಿ ಪಾತ್ರ ನಂಗೆ ತುಂಬಾ ಹತ್ತಿರವಾಯಿತು, ರಾಜಕುಮಾರಿಯನ್ನು ಹಾರಿಸಿಕೊಂಡು ಹೋಗಲು ಬಂದಿದ್ದ ಮಾರುವೇಷಿ ರಾಕ್ಷಸ, ರಾಜಕುಮಾರನನ್ನು ನಿರೀಕ್ಷಿಸುವ ರಾಜಕುಮಾರಿ ಮನಸಲ್ಲಿ ಕರಗಿಹೋದರು. 
ಮಗಳ ಮದುವೆಯ ಗುಂಗಲ್ಲೇ ಕಾರ್ಯನಿರತರಾಗಿರುವ ಅಪ್ಪ ಅಮ್ಮ, ಮನೆ ಮನತನ ಹಣ ಅಂತಸ್ತು ಖರ್ಚು ವೆಚ್ಚ ಎಂಬಿತ್ಯಾದಿ ವಿಚಾರ, ಆಗಾಗ  ಬರುವ  ಮದುವೆಯ ಪ್ರಸ್ತಾಪಗಳು ಕಿವಿ ಬಡಿಯುತ್ತಲೇ ಇವೆ, ಅದೇನೋ ದಿಗಿಲು ನನಗೆ, ಎಲ್ಲೋ ಕಳೆದು ಹೋಗುತ್ತಿನೇನೋ ಎನ್ನುವ ಆತಂಕ, ಆವರಿಸಿರುವ ಗೊಂದಲ. ರಾತ್ರಿ ಕನಸಲ್ಲೂ ಕಾಡುವ ನಿರ್ಭೀತ ಪ್ರಶ್ನೆಗಳು; ನಿಂತು ಹೋಗುವ ನಿಶ್ಚಿತಾರ್ಥ, ಮದುವೆಯ ಮಂಟಪದಿಂದ ಓಡಿಹೋಗುವ ನಾನು, ಹಾದುಹೋಗುವ ಮಾರುವೇಷದ ರಾಜಕುಮಾರನ ಭಿತ್ತಿ. 

ಮತ್ತದದೇ ಪ್ರಶ್ನೆ! ಬಂದವನು ರಾಜಕುಮಾರನೇ? ಲ್ಲವೇ? ಗುರುತು ಹಿಡಿಯುವುದಾದರು ಹೇಗೆ ? ಕಡಲೆ ಹಿಟ್ಟಿನಂತ ಉಪಾಯವೇನಾದರು ಸಿಗಬಹುದೇ? ಈಗಲೂ ಅದೇ ಸ್ಥಿತಿ, ಹುಡುಕಾಟದ ಕಣ್ಣುಗಳು, ಸುಳಿವಿನ ಅಪೇಕ್ಷೆ! ಕತೆ ಮತ್ತೊಮ್ಮೆ ಹೇಳಲಿಕ್ಕೆ ಇಂದು ಅಜ್ಜಿ ಇರಬೇಕಿತ್ತು, ತಲೆ ನೇವರಿಸಿ ಮಲಗಿಸಬೇಕಿತ್ತು.